طفلي والقرآن

عشر خطوات لبناء علاقة أولادنا مع القرآن

١- قبل الولادة: انتي هتقرأي قرآن بصوت عالي وجنينك هيسمعك ويتونس بالقرآن بصوتك ‌❤️⁩

٢- بعد الولادة: هتقرأي قرآن وانتي بترضعي البيبي وهتلاحظي إنه بيهدأ جدا لأنه ربط بين صوت القرآن واحساسه بالأمان داخل الرحم ‌❤️⁩

٣- مرحلة تعلم الكلام: هانكرر سور معينة قصيرة المقاطع على مسمع الطفل ومع الوقت هيحاول يقول معانا ولو نفس النغمة أو آخر صوت في المقطع .. السور المناسبة الفاتحة والإخلاص والمعوذتين .. ممكن نشغل القرآن جنبنا أثناء اللعب وفي الأوقات اللي الطفل فيها مبسوط ورايق.. وأساسي نردد أذكار النوم وفيها آية الكرسي وخواتيم البقرة والمعوذات .. المرحلة دي أساس المراحل القادمة وبتسهل جدا تعلم القرآن 💪

٤- مرحلة اتقان الكلام: نبدأ تعليم القرآن بحلقة قصيرة ونخصص قرآن للطفل ونعلمه يحافظ عليه ازاي ويتعامل معاه بحرص .. وقت الحلقة هو أهم عامل .. نختار الوقت اللي الطفل فيه رايق ومبسوط وشبعان ونشيط .. ممكن يتحرك عادي أثناء القراءة .. أنا فاكرة ابني مصطفى لأنه حركي جدا كان بيقضي الحلقة راكب على العجلة أو متشقلب على راسه 😅 عادي المهم إنه بيقرأ .. هو مش هيقدر يقعد فعلا .. والحركة بتساعده على التركيز وعدم التشتت.. بس تأكدي إن الطفل الحركي كل ما يكبر بيهدأ ويقدر امتى يتحرك وامتى يقعد .. بس نبقى نناقش النقطة دي باستفاضة في بوست تاني ان شاء الله

٥- نستمر على حلقتنا بقى وننوع في السور .. مش لازم نمشي بترتيب معين .. بس عادة بنشتغل من جزء عم من نهايته بعدين تبارك وهكذا لحد ما ننهي جزء الأحقاف وبعدين ننتقل لبداية المصحف وفيه ترتيبات أخرى للحفظ .. يعني مفيش طريقة واحدة ثابتة للكل .. نبقى أكثر مرونة في النقطة دي

بنقرأ مع الطفل بالتلقين وهو يردد معانا ..

الحلقة يعني حفظ وفهم وتدبر مع بعض أو على أكتر من جلسة حسب ظروف الأسرة ..حلقة نقرأ وفي جلسة أخرى الطفل هو اللي يسمع .. وماننساش شرح تفسير مبسط تكوني مجهزاه مسبقا .. وتكوني مستعدة للرد على أسئلة الطفل وتدبر القرآن معاه .. خليكي عارفة ان طفل الأربع سنوات ممكن يوصل إنه يسأل ٤٠٠ سؤال في اليوم .. فكوني صبورة .. خصوصا الطفل القرآني أسئلته كتير لاتساع مداركه 💜💜

٦- نعمل مسابقات وأنشطة تساعد على ربط الطفل بالقرآن .... مهم نراعي في الأنشطة عدم تجسيد الغيبيات تماما ✋

٧- بعد ما تلاحظي اعتياد الطفل على حلقة القرآن وإن مخارج ألفاظه مضبوطة بنسبة ٥٠٪ تقريبا.. يعني ما زال عنده حروف مش مظبوطة وغير متقن لأحكام التجويد حتى بالتلقين (فيه أطفال بتتقن الأحكام بالتلقين وأطفال لأ حسب درجة الذكاء اللغوي للطفل وحبه للقراءة وهل نمطه سمعي أم لا)

المهم في الوقت ده نبدأ تعريف مبسط بأحكام التجويد .. اللامات الشمسية والقمرية .. المدود .. بيكون دارسها في المدرسة فعلا .. ممكن نحفظ متن تحفة الأطفال ونشرحه ونطبقه في القراءة .. ممكن نشتغل معاهم نورانية أو نور البيان لضبط الحروف العربية .. دي مرحلة محتاجة تكوني انتي تعلمت الكلام ده مسبقا أو محتاجة معلمة قرآن .. وطبعا نختار معلمة تحبب الطفل في القرآن مش تنفره .. وتكون متفقة معاكي في أسلوب التعامل مع الطفل 🌸🌸

٨- الطفل وصل من ٧-٨ سنوات بيقرأ لوحده بدرجة معقولة .. يخصص له مصحف جديد ..دلوقتي نحصد بقى ونجمع كل جهدنا السنين اللي فاتت في ختمة تصحيح تلاوة بترتيب المصحف 💙 نقرأ قليل كل يوم بس نصحح القراءة ونذكر بالأحكام ونتدبر ونتعلم معاني ..

المرحلة دي هتاخد مننا سنوات ومحتاجة صبر وعزيمة واستمرارية .. لكن ثمرتها تعارف الطفل على القرآن كاملا بدون حفظ .. الختمة دي هاتربطه جدا بالقرآن وهاتعرفه آيات جديدة وتعوده على مختلف سور القرآن الطوال والمثاني والمفصل .. بعد ما كنا غالبا مركزين على المفصل في السنوات السابقة

في نفس الوقت عنده ورد حفظه شغال عادي .. مش مهم الكم .. المهم الكيف والاستمرارية والربط بالحياة .. العمل بالقرآن أهم من مجرد القراءة والحفظ

حاولي تشتغلي مع طفلك إنك تأهليه إنه يبدأ يقرأ ويحفظ لوحده .. يعني على سن ٩-١٠ سنوات وممكن قبل كده في بعض الأطفال يكون دورك تسميع وتدارس معاه بس .. ومش محتاجة تحفظيه بنفسك .. ده هيساعده جدا يبني علاقته الخاصة بالقرآن والولاد أوقاتهم أكثر فراغا مننا .. فممكن ماتقدريش تقعدي معاه كتير لكن هو يقدر يقرأ وينجز لوحده

٩- المرحلة دي الطفل أتقن أحكام التلاوة وقرأ ختمة كاملة تعارف على القرآن بالقراءة الصحيحة والتدبر والفهم .. هو غالبا مبقاش طفل خلاص .. كبر اللهم بارك وبقى مكلف .. الوقت بقى مناسب لختمة إجازة حفظ مع شيخ 💪💪💪

١٠- خلص الإجازة اللهم بارك 👏👏👏👏 يبدأ يعلم غيره بقى .. نشجع ابننا إنه يعلم قرآن في مسجد قريب أو زملاءه في المدرسة أو الجامعة ويكمل مسيرة أهل القرآن ويكون سابق بالخيرات بإذن الله ‌❤️⁩‌❤️⁩‌❤️⁩‌❤️⁩

والله عيني دمعت وأنا باكتب اللحظة الغالية دي ربنا يكتب لي أشوفها في ولادي وكل من أعتبرهم أولادي ‌❤️⁩‌❤️⁩ ويكتبها لكل أم بتجاهد مع ولادها يا رب ‌😍🌹

اللهم اجعلنا وأبناءنا من أهل القرآن العاملين بما فيه

ربنا هب لنا من أزواجنا وذرياتنا قرة أعين واجعلنا للمتقين إماما

اللهم اجعل أبناءنا شبابا وبناتا ينشأون في طاعتك واهدهم لأحسن الأخلاق لا يهدي لأحسنها إلا أنت واصرف عنهم سيء الأخلاق لا يصرف سيئها إلا أنت

#د_هبة_المنجي

#أكاديمية_التربية_الرحيمة

#طفل_قرآني

أكاديمية التربية الرحيمة

طفلي والقرآن

تعليقات (0)

لا توجد تعليقات.